PP, 35

Le pergamene dell'Archivio della Prepositura di Trento (1154-1297), a cura di E. Curzel, S. Gentilini, G.M. Varanini, Bologna 2004.

Anno Domini millesimo ducentesimo XX, indictione octava, die XI exeunte aprilli, in curia monasterii Sancti Laurentii, in presentia Riprandi de Nacu, Bertoldi de Anania, Bertoldi de Mucrasico, Ambrosii et Comitis coqui, Mageni pluriumque aliorum. Ibique dominus Amulpertus abbas dicti monasterii, de consensu et volumtate dompni Iohanis, magistri Greponis, dompni Alberti fratrum suorum ibi presentium, iure locationis imperpetuum secundum consuetudinem domorum mercati Tridenti investivit Dominicum de Castrofumdo tamquam liberum hominem in eo suisque heredibus utriusque sexus liberis nominatim de duobus passis terre casalive posite in contrata Sancti Martini, cui coheret a duabus partibus terra casaliva que tenetur per dictum monasterium, de retro Atesis, de ante via publica, ita ut ipse Dominicus et eius heredes amodo in antea predictam terram ad domum levandam cum omnibus suis pertinentiis, coherentiis, confinibus, racionibus superioribus et inferioribus suis in integrum habere et tenere et uti debeat, vendere, donare, pro anima iudicare sine omni predicti abbatis eiusque successorum contradictione, excepto quod non liceat ei nec eius heredibus militi nec servo nec potenti homini nec persone alicuius servilis condictionis ipsam rem locatam alienare, ad fictum hinc in antea solvendum nuncio dicti monasterii per se vel eius heredes annuatim in die sancti Michaelis vel eius octavo XX solidos veronenses conductos ad dictum monasterium, et si ita annuatim non solverit in dicto termino quod deinde infra annum debeat fictum induplare sine alia pena, et si steterit per duos annos quod non solvat dictum fictum ut dictum est, quod debeat ipse locator ab omni suo iure cadere et rem locatam cum omni melioramento dicto monasterio expeditam dimittere et nichilominus fictum dictorum duorum annorum non solutum solvere. Promisit dictus abbas pro se et suis successoribus dictam rem locatam ab omni persona racione defendere et expedire aut dampnum in duplum ei restituere secundum quod res fuerit meliorata aut valeret sub extimatione et in consimili loco; et si ipse locator aliquo tempore suum ius vendere voluerit, domino monasterii requirere debet et ei pro XX solidis minus dare quam alii si emere voluerit, et si infra XV dies post requisictionem factam emere noluerit, vendat postea cui velit preterquam exceptatis et tali persone que ydoneam securitatem faciat de ficto prestando, confirmante domino dicti monasterii investituram pro una libra piperis, nullam aliam superimpositam faciendo. Et stetit inter eos quod si aliquo tempore apparuerit quod ipse locator vel eius heredes non essent liberi vel quod se servituti alicuius domini subponerent, quod dicta investitura penitus sit cassa et inutilis et quod dicta res locata cum omni melioramento statim ad dictum monasterium libere revertatur sine omni predicti locatoris eiusque heredum contradictione. Et ita precepit ei sua auctoritate tenutam intrare. Et plures cartas unius tenoris inde scribi rogaverunt.

(SN) Ego Obertus de Placentia notarius sacri pallacii huic interfui et rogatus ita scripsi.