PP, I.7

Le pergamene dell'Archivio della Prepositura di Trento (1154-1297), a cura di E. Curzel, S. Gentilini, G.M. Varanini, Bologna 2004.

(SN) Die mercurii quintodecimo exeunte augusto, in presencia episcopi Iohannis Brixiensis, Natali presbiteri, Ade capellani episcopi Omnisboni Veronensis, magistri Prevedi de Cremona, presbiteri Vivencii de Arçei, Pedisaceti de Brixia et aliorum. In eorum presencia, talis concordia fuit inter abatem Lafrancum Sancti Laurencii de Tridento et inter magistrum Lafrancum fratrem abatis Israel Vallis Alte, qui dicebat agere causam illam pro ipso abate, videlicet quod dicebant quod abas Sancti Laurencii veniet ad dominum abatem Vallis Alte et in capitulo fratrum recipiet correccionem sicuti a suo abate, et si voluerit iam dictus abas Vallis Alte iterum hobedienciam faciet monachos Vallis Alte in monasterio Sancti Laurencii et monachos Sancti Laurencii secundum regulam sancti Benedicti in monasterio Vallis Alte, secundum quod videritis expedire, de communi consilio transmutabitis pro varietate temporum, salvis privilegiis utriusque monasterii et ecclesie˛ Tridentine, et cesante omnium de cetero accusacione precedencium obiectorum vel obiciendorum, nisi de cetero talia perpetrarentur ab ipso abate Lafranco, que correccione et castigacione indigerent, et illis monachis et conversis quos sibi abas Vallis Alte concesserit, precipiet abati hobedire Sancti Laurencii ceu sibi coguntur hobedire, cessante omni fraude et dolo.

Actum fuit hoc in Venecia, in domo patriarce, anno a nativitate Domini millesimo centesimo LXXVII, indictione decima.

(SN) Ego Adhemarius domini imperatoris Federici notarius rogatus interfui et hanc concordiam scripsi.