PP, 189

Le pergamene dell'Archivio della Prepositura di Trento (1154-1297), a cura di E. Curzel, S. Gentilini, G.M. Varanini, Bologna 2004.

(SN) Anno Domini millesimo ducentesimo nonagesimo sexto, indictione nona, die mercurii XXII intrante aprilis, Tridenti ante domum abitacionis infrascripti domini Siboti, presentibus Nicolao notario filio condam Adelpreti Vaterii, Odolrico Vogelo, Artemanno fabro filio condam Federici fabris de Matarago, Muso qui stat ad ospitale Sancte Marie ad plebem et Iacobino Castrono et aliis testibus. Ibique Federicus condam Hongolrati qui stat ultra pontem Atacis iusta Sanctum Laurentium et eius uxor Adeleita refutaverunt in manibus domini Siboti presbiteris, tamquam provisoris et administratoris eccllesie Sancti Nicolay iusta Tridentum et ospitalis ipsius eccllesie et pro dicto ospitale et pro dicta eccllesia, omne eorum ius, raciones et acciones reales et personales, speciales, utiles et directas quod et quas habent et visi sunt habere in una pecia terre partim aratoria et partim vineata iacenti subtus Bunam subtus dossum Sardagne, cui choeret ab una parte vineale quod fuit condam Tridentini Coste et nunc est Antonii Iuvenis de Sardagna, ab aliis duabus partibus terra eccllesie suprascripte Sancti Nicolay, a quarta via communis et forte alie sunt choerencie, de qua pecia terre solvebat ficto perpetuali dicto domino Siboto pro dicto ospitale et pro dicta eccllesia Sancti Nicolay sex starios bone et pulcre salis magne omni anno in quolibet festo sancti Michaelis aut in octava; quam refutacionem fecerunt dicto domino Siboto provisori ad hoc quod ipse dominus Sibotus, tamquam provisor et administrator predicti ospitalis et eccllesie predicte, investire debeat Conradum Soanerium de Ultimo et eius uxorem Gertrudam de predicta pecia terre refutate cum omnibus suis iuribus ad eundem fictum perpetualiter persolvendum, a quibus Conrado et Gertruda confessi et manifesti fuerunt predicti Federicus et Adeleita iugales recepisse et abuisse quinque libras denariorum veronensium parvorum, renuntiando exceptioni non abite et recepte pecunie et ipsam in se habere dixerunt tempore contractus. Promiserunt predicti Federicus et Adeleita iugales per se suosque heredes predicto domino Siboto provisori et dictis Conrado et Gertrude iugalibus predictam refutacionem semper firmam et ratam habere et tenere et utile dominium dicte pecie terre eisdem ab omni contradicenti persona cum racione defendere et warentare sub obligacione omnium suorum bonorum que habent et aquistaverunt et per eas se possidere manifestaverunt. Hoc facto incontinenti predictus dominus Sibotus, tamquam provisor et administrator predicti ospitalis et predicte eccllesie et pro dictis ospitale et eccllesia, nomine locacionis in perpetuum ad usum et consuetudinem domorum mercatus Tridenti investivit predictum magistrum Conradum et predictam Gertrudam eius uxorem de predicta pecia terre refutate cum omnibus suis racionibus et accionibus, cum introitu et exitu, cum superioribus et inferioribus dicte rei locate pertinentibus ad abendum, tenendum et poscidendum et ad omnem suam utilitatem faciendam cum infrascriptis condictionibus ad fictum perpetualiter persolvendum dicte eccllesie et ospitali Sancti Nicolay et ipsi domino Siboto et suis sucessoribus pro dicta eccllesia et ospitale sex starios bone et pulcre salis magne in quolibet festo sancti Michaelis aut in octava sub pena dupli, tali pacto quod si non solverint ad terminum quod indupletur et si non solverint in secundo anno ad terminum quod cadant de omni suo iure dicte locacionis in dictum locatorem et fictum retentum nichil minus atendere teneantur; et licitum sit condutoribus ius suum vendere, donare, pro anima iudicare cui voluerint excepto eccllesiis, militibus, potenti viro, servis et famulis vel tali persone que non esset suficiens ad solvendum suprascriptum fictum, sed si ius suum vendere vellet, primo denunciare debeant dicto locatori et ei dare debeant pro XX solidis minus quam aliis personis si emere vellet, si vero emere non vellet infra XV dies posquam ei fuerit denunciatum postea vendat cui voluerit excepto suprascriptis personis exceptatis, dando semper dicto locator unam libram piperis pro omni nova confirmacione in alium emptorem ad hoc quod alia superinposita non fiat inter eos. Promisit predictus dominus Sibotus tamquam provisor et administrator predicti ospitalis et eccllesie predicte et pro ipso ospitale et eccllesia predicta et pro suis sucessoribus predictis Conrado et Gertrude iugalibus pro se et suis heredibus predictam peciam terre locate ab omni persona contradicenti cum racione defendere et warentare sub obligacione omnium suorum bonorum predicti ospitalis et eccllesie predicte, et dedit eis verbum et licenciam sua auctoritate intrandi tenutam et corporalem possessionem.

Ego Thomasius filius condam Hermani tabernarii domini Federici imperatoris notarius interfui et rogatus scripsi.