PP, 32

Le pergamene dell'Archivio della Prepositura di Trento (1154-1297), a cura di E. Curzel, S. Gentilini, G.M. Varanini, Bologna 2004.

(SN) Anno Domini millesimo CCXVIIII, indicione VII, die tercio exeunte augusto, in burco Bolcani, in domo locatricis, presentibus domino Henrico de Songo, Sivreto eius fratre, Aiçio filio condam Poaçani, Rodulfo Trageçolo de Tridento, domino Ermanno de Raide, Arnoldo de Xongo et aliis testibus ad hoc rogatis. Ibique domina Elica uxor condam Ermanni Vachelini de Bolçano, curatrix sui filii Odolrici Vachelini ut ipsa dicebat et pro ipso Odolrico curatorio nomine, iure locacionis in perpetuum ad usum et consuetudinem domorum marcatus Tridenti, investivit Saurinum peliparium de Tridento nominatim de duobus domis illius Odolrici cum una canipa que iacet in civitate Tridenti, in hora stupe Sancte Marie plebis, cum omnibus suis pertinentiis, racionibus et accionibus, introitu et exitu, et cum superioribus et inferioribus suis in integrum dictis domis pertinentibus, que iacent insimul una aput aliam, coheret eis ab uno latere Calderarius, ab alio habet ipsa locatrix, et ab uno capite est bradum domini Riprandi et ab alio via, et alii forte sunt coherentes. Tali vero pacto investivit eum de illis domis cum canipa quod ipse Saurinus conductor et eius heredes illam locacionem hinc in antea habere et tenere debeat sine ulla contradicione dicti Odolrici et illius domine pro eo et suorum heredum, ad fictum solvendum omni anno illi domino ut curatrix pro suo filio et ei et suis heredibus in kallendis marcii, VIII diebus ante vel VIII post, VIII solidos minus de V libris veronensibus, et de terra illorum domorum similiter solvere debet XXVIII solidos veronenses omni anno de quibus datur abbati Sancti Laurencii XX solidi veronenses et domino Riprando Otonis Richi VIII solidi veronenses, et si tunc fictum solutum non fuerit infra annum indupletur, alia vi nec superinposita inter eos fieri non debeat; quam vero locacionem dicta domina ut curatrix pro suo filio et pro ipso curatorio nomine per se et eius heredes et per heredes sui filii promisit ipsi Saurino et eius heredibus semper hinc in antea omni tenpore ab omni persona cum racione defendere et warentare et exspedire in pena dupli et dampni in quo ipse evenerit tenpore evicctionis exstimandi in consimili loco, licitum sit conductori suum ius quod habet in dicta locacione vendere, donare, pro anima iudicare cuicumque voluerit excepto tali persone que fictum non inpediat, et si suum ius vendere voluerit, primo denunciare debeat ipsi domine vel eius filio et eis pro XX solidis ad minus dare debeat de eo quod ab alia persona sine fraude habere potuerit si emere voluerint, et si emere noluerit infra XV dies postquam ei domine vel eius filio denunciatum fuerit tunc vendat cui voluerit habente locatrix vel eius filius I libram piperis pro omni nova confirmacione in emptore facta, et ita per eum possidere manifestavit et per eius interdicto desiit possidere et per ipsum in possesionem in integrum iussit et dedit ei dictum Rodulfum qui ducat eum in tenutam. Hoc facto ipsa domina promisit illi Saurino et ei wadiam dedit in suis manibus quod ipsa faciet eius filium Odolricum laudare et confirmare in ipso Saurino dictam locacionem et investituram dictorum domorum et canipe ut supra scripte sunt sicut sapiens homo misterii preciperit hinc ad VIII dies post adventum illius Odolrici et post quando ei rederit in pena dupli et dampni in quo ipse venerit pro facienda illac confirmacione, quaus wadie fideiusores et principales debitores inde fuerunt dicti Henricus de Sonço et Rodulfus Tragecolus, ita quod specialiter possit se tenere ad quem eorum voluerit de omni dampno et suprascriptis, quod ipse Saurinus faceret pro facienda illa confirmacione et in dupli et dampni in quo ipse venerit, renunciando ipsi auxilio epistule divi Adriani et nove et veteri constitucioni et omni legum auxilio.

Ego Stephanus sacri pallacii notarius interfui et rogatus scripsi.