PP, I.15

Le pergamene dell'Archivio della Prepositura di Trento (1154-1297), a cura di E. Curzel, S. Gentilini, G.M. Varanini, Bologna 2004.

Gumselmi de Archo et Ugheçonis.

Die iovis septimo intrante februario, in Tridentino episcopatu, in domo scarie domini abbatis Sancti Laurentii Tridenti, in presentia domini Iohannis iudicis, Stephani de Cavedano, Finelli de Banallo, Albertini de Scaria, Iordani de Padua et aliorum testium rogatorum. Ibique dominus Clericus abbas monasterii Sancti Laurentii de Tridento, pro precio finito de XXV libris veronensium, quas fuit confessus accepisse ab Ugheçone filio quondam Rubaldi de Archo, solvente pro se et nomine ac vice Gumselmi fratris sui, nominatim pro hedificatione monasterii Sancti Laurentii facienda in iscla Atexis de contrata Molinarii, renuncians exceptioni non numerate peccunie, de consilio domini Meraldi ibi presentis, vendidit eidem Ugheçoni, recipienti pro se et dicto Gumselmo, nominatim de triginta solidis veronensium fictum omni anno, et proprietatem integre unde solvebatur dictum fictum, ubicumque sit vel inveniri possit in prebatu Tenni et Archi et Naci vel in alio loco, cum omni iure et racione regule de Collogna, quod fictum dictus Rubaldus quondam pater ipsorum et ipsi post eius mortem antiquitus solverunt et solvere tenebantur dicto monasterio Sancti Laurentii. Et si plus valeret de iamdicto precio, de eo quod plus valeret eis donationem inter vivos fecit, que ulterius propter aliquam causam revocari non possit, ita ut ipsi et eorum heredes et cui dederint dictum fictum et proprietatem et possessionem predictam unde solvebatur cum omni iure et racione regule dicte regule, quam ipse Rubaldus et eius filii predicti habeant in racione dicte locationis, ut ibidem dicebant dominus abbas et ipsi et cum omni utilitate et melioramento, cum introitu et exitu et cum omni alia racione dicto ficto et dicte proprietati unde solvebatur, habeant et teneant et quicquid velint iure proprii faciant, sine omni predicti domini abbatis et eius successorum contradictione; et promisit defendere sub dupla super bonis dicti monasterii specialiter obligando. Et omnia sua iura et actiones tam reales quam personales sibi propter hac competentes tam in rem quam in personam eidem Ugheçono dedit, cessit atque mandavit, et ipsum ut in rem suam procuratorem pro se et dicto suo fratre constituit, ut possint ita agere petere et omnia facere, sicut ipse poterat. Et sic pro eis se possidere constituit, dando eis licentiam sua auctoritate intrandi tenutam; et insuper dedit ei dictum Stephanum, qui ipsos inde ponat in tenutam.

Postea, die sabbati XIIII exeunte februario, in Tridentino episcopatu, in stupa posita super isclam de Molinario, que est domini abbatis Sancti Laurentii, in presentia magistri Albrigeti, magistri Itexalchi, Viviani, Uti, Diatemarii et aliorum testium rogatorum. Ibique dominus Margaritus et frater Wido et frater Bonaventura monachi dicti monasterii Sancti Laurentii Tridenti confirmaverunt dictam datam et vendicionem et omnia predicta.