PP, I.1

Le pergamene dell'Archivio della Prepositura di Trento (1154-1297), a cura di E. Curzel, S. Gentilini, G.M. Varanini, Bologna 2004.

In Christi nomine. Anno ab incarnatione Domini nostri Yesu Christi millesimo centesimo XLVI, in mense iulii, indictione VIIII, regnante glorioso domino Conrado Dei gratia Romanorum rege. Infructuose arboris succisione deterriti, ac beati illius viri exemplo vocati qui in lege Domini die ac nocte meditando tamquam fructiferum lignum fructum suum dare scribitur in tempore suo, dubitare minime possimus nobis esse damnabille si neglegamus dum vivimus, bone cogitationis simul et actionis fructum qui maneat ferre. Cunctorum quapropter ista legentium presentium, silicet ac futurorum noverit industria, quod ego Altemannus sancte Tridentine ecclesie humillis episcopus, auctoritate simul et favore domini mei patriarce Peregrini, assensu nichilominus et consillio venerabillium fratrum meorum canonicorum et alliorum clericorum meorum, simulque consensu advocati mei et ceterorum sapientium nobiliumque virorum, in monasterio Beati Laurentii martiris, quod est situm iuxta fluvium Athesis et pontem ipsius fluminis, quod quidem monasterium ad monasticam vitam in ibi regulariter tenendam a primis edificatoribus constructum est, fratres in eo de relico stabillius quam eatenus sub monastica regula victuros constitui, viro honesto et rellioso nomine Oprando in patrem illis et rectorem habito, ordinationem abatum, qui secundum regulam beati Benedicti, premissa fratrum ellectione, regulariter ibi substituendi sunt ad venerabiles episcopos succesores meos katolicos qui pro tempore fuerint pertinere volui, omnemque locum illum sub regimine et tuicione seu defensione venerabilis Tridentini episcopi omni tempore manere institui, quem tanto vigillantius ac dilligentius in defensione predictorum fratrum oportet utique laborare quanto eos constat pro divino amore de sua defensione non multum satagere. Igitur ad exercendam sancte profesionis milliciam competentia auctore Deo stipendia, una cum fratribus meiis preparare disponens, tibi, dillecte fili Oprande, tuisque fratribus cunctisque per futura tempora ibidem conversantibus, prefatum locum cum omnibus suis possessionibus omnibusque bonis, tam in campis quam in vineiis quam etiam in pratis seu cunctis que iuris eius sunt, ad habendum et tenendum dono, cedo, trado in integrum, et facias exinde tu et oficiales predicti monasterii qui pro tempore fuerint legaliter iure perpetuo quicquid volueritis, salva semper utilitate et comodo ipsius monesterii, pro anime mee meorumque sucessorum et antecessorum et totius cleri ac populi Tridentini et remedio et mercede, sine omni mea meorumque sucessorum meorum contradictione, ita quod predicti monesterii fratres et oficiales numquam recedant ab ordine et regula fratrum Valis Alte. Si quis autem, quod evenire non credo, episcopus, archidiaconus, prepositus, comes, vicedominus, advocatus, castaldio, clericus vel laycus hanc mee institutionis paginam quolibet modo infringere temptaverit, locique illius relligionem ac quietem agravando seu vim alliquam inferendo perturbaverit, sit ille anatema maranatha, liceatque iam predicti monesterii rectoribus sedem apostolicam apellare eiusque tuicionem et auxillium contra quoslibet se iniuste agravantes implorare, quia sic est bona mea voluntas. Actum in civitate Tridentina, in ecclesia Beati Vigilli martiris, feliciter. Huius constitutionis et confirmationis testes sunt Vitalis de Clese, Iohannes de Roveredo, Oldaricus frater eius, Olliverus de Civizano, Albertus picttor de Mantua, Andreas de Pergamo, Peregrinus de Verrona, Ambrosius camarerius, Otto Grassus, Tridentinus malle regulatus, Tridentinus Trabugo, Tridentinus cellerarius, Gompo de Lavedo, Vivianus consanguineus eius, Adelpretus filius Millonis, Hermanus et Varibertus et alii quam plures.

+ Ego Altemanus Dei gratia Tridentinus episcopus prescriptam tradicionem feci et manu mea subscripsi.

Ego Svikerius decanus interfui et subscripsi.

Ego Sigeridus presbiter subscripsi.

Ego Ubertus presbiter subscripsi.

+ Ego Ieconias maioris ecclesie archidiaconus manu mea subscripsi.

Ego Aduinus diaconus auffi et subscripsi.

Ego Lanfrancus diaconus subscripsi.

Ego Inverradus episcopus Tridentine ecclesie subscripsi.

Ego Salemon diaconus subscripsi.

Ego Federicus subdiaconus affui et subscripsi.

Ego Tridentinus subdiaconus interfui propriaque manu subscripsi.

Ego Valtofus subdiaconus interfui ac scripsi.

Ego Veriandus presbiter interfui.

Segue questa formula di autenticazione:

(SN) Ego Baptizatus de Episcopis de Triscurio, notarius ac misus regius, autenticum huius exempli vidi et legi et rescripsi, et nichil plus minusve in illo continebatur quam in isto, nisi forte litera vel sillaba, remota omni fraude et dollo.