PP, 193

Le pergamene dell'Archivio della Prepositura di Trento (1154-1297), a cura di E. Curzel, S. Gentilini, G.M. Varanini, Bologna 2004.

Anno Domini millesimo ducentesimo nonagesimosexto, indicione nona, die dominico XXV° intrante novembri, iuxta Tridentum in monasterio Beati Laurentii, presentibus Willielmo condam Fabe, Iacobo Mussata auriffice, Peramussio filio Tureseti de Tridento, Bonomo condam Passii a Nave et Iacobino de Albyano testibus et aliis. Ibique dominus dumpnus Gerardus abbas monasterii prelibati, presentibus fratre Tridentino, fratre Nicolao monachis, fratribus Bonaventura, Henrico et Alberto conversis dicti monasterii, de verbo et consensu ipsorum fratrum pro se et dicto monasterio et capitulo et conventu fratrum ipsius, nomine locationis a proximo festo beati Nicolay hinc ad unum annum secundum ussum e consuetudinem locationis infrascripte mute investivit Bonomum filium Pellegrini et Zaninum condam Warnerii a Nave de muta pontis a Nave pertinente et spectante ad dictum monasterium et iure et de iure et ratione percipiendi et exigendi ipsam mutam a quibuscumque transeuntibus per ipsum pontem et solvere debentibus ipsam mutam, ita silicet ut dicti conductores dictam mutam percipere et exigere possint hinc ad dictum terminum a quibuscumque transeuntibus et solvere debentibus prout solitum est et debet sine omni predicti domini abbatis et dicti monasterii contradicione ac successorum ipsius, solvendo ipsi conductores eidem domino abbati nomine dicti monasterii trigintadues libras denariorum parvorum pro ficto et nomine ficti de ipsa muta, et iam solutum vocavit et plenarie satisfactum a predictis conductoribus, et predictus dominus abbas de XX libris denariorum parvorum renuntians exceptioni non habite, recepte ac non numerate pecunie tempore huius contractus et exceptioni dolli malli condicioni sine causa pacti conventi et in factum actioni et certe dictam pecuniam et solutam in se bene habuit et recepit dictus dominus abbas, reliquas autem XIIcim libras solvere teneantur et debeant dicti conductores hinc ad proximam festam beati Iohanis de mense iunii. Promissit quoque dictus dominus abbas pro se et nomine suprascripto per stipulacionem dictis conductoribus dictam mutam hinc ad dictum terminum deffendere, vuarentare et legittime exspedire ab omni impedienti persona prout moris est dicte mute sub ypotheca et obligatione bonorum omnium dicti monasterii presentium et futurorum, et dedit eis ex nunc verbum et licentiam intrandi tenutam et possessionem vel quasi de dicta muta et iure et ratione percipiendi et exigendi ipsam mutam ut dictum est; quandocumque adveniente ipsorum terminorum [.....] sua, talli pacto habito inter eos et facto expresse quod dictus dominus abbas propriis exspensis manutenere et aptare debeat dictum pontem, et si infra dictum terminum fieret seu inciperetur wera in episcopatu Tridenti propter quam impediretur dicta muta, quod habere, percipere et exigere possint et debeant ipsam mutam tanto tempore ultra dictum terminum quanto duraret ipsa wera.

(SN) Ego Riprandus filius domini Bonomi iudicis de Tridento sacri pallacii notarius predictis interfui et rogatus scripsi.