PP, 188

Le pergamene dell'Archivio della Prepositura di Trento (1154-1297), a cura di E. Curzel, S. Gentilini, G.M. Varanini, Bologna 2004.

(SN) Anno Domini millesimo CC°LXXXX quinto, indicione octava, die dominico penultimo octubris, apud Tridentum in monasterio abbatie Sancti Laurentii apud Sanctum Apolinarium apud ortum et domum coquine antique, presentibus domino Bontempo prespitero, fratre Henrico de Ysproco qui nunc moratur cum domino abbate infrascripto, Iacobo Musata aurifice, Crexeto viatore, Romano molinario et aliis. Ibique Çulianus caliarius de Fossato qui Bolçollus dicitur filius condam Tridentini Bolçolli reffutavit in manibus domini Gerardi Dei gratia abbatis monasterii et abbatie Sancti Laurentii de iuxsta Tridentum, recipientis pro dicto monasterio et abbatia predicta, presentibus fratribus Nicolao, Amico et Bonaventura conversis monasterii suprascripti, omne suum ius, utile dominium et melioramentum quod et quas ipse Çulianus Bolçollus caliarius habet vel habebat seu in futurum habere poterat vel sperabat in una domo edificata cum muris et lignamine et canipa iacenti in civitate Tridenti in contrata Lastarum seu Parolariorum ab Aquila, cui coheret ab uno latere versus meridiem dictus venditor seu reffutator, ab alio latere versus occidentem etiam dictus Çulianus refutator, ab alio latere versus orientem via communis que vadit de ianua Aquile versus castrum, ab alio latere versus septemtrionem Gisla uxor Nicolai a Veietibus de Cavedeno et alie forte sunt ei coherentie, de qua domus consuetus est et tenetur seu tenebatur ipse Çulianus solvere ipsi domino abbati pro abbatia predicta undecim solidos denariorum veronensium parvorum ficti perpetuo omni anno in kalendis martii vel earum octava cum omnibus suis pertinentiis, mensuris, iuribus, racionibus et actionibus cum introitibus et exitibus suis in integrum, quam reffutationem fecit in dictum dominum abbatem ut investire debeat Tridentinum caliarium condam Ruxe portitoris de dicta domo ad dictum fictum solvendum, pro qua reffutatione confessus fuit et manifestavit predictus Çulianus se nomine certi et finiti precii et mercati accepisse et habuisse quindecim libras et dimidias denariorum veronensium parvorum a predicto Tridentino, renuntiando exceptioni non date, habite, numerate et recepte pecunie et doli mali et omni legum auxilio sibi conpetenti vel conpetituro. Quo facto ibidem incontinenti predictus dominus Gerardus Dei gratia abbas predictus predicti monasterii et conventus et pro dicto monasterio seu abbatia, presentibus et consentientibus confratribus seu monacis suprascriptis, nomine locationis imperpetuum secundum usum et consuetudinem domorum mercati Tridenti investivit Tridentinum caliarium suprascriptum recipientem pro se suisque heredibus et ab eo causam habentibus nominatim de predicta domo iacenti et posita infra coherentias suprascriptas cum omnibus suis pertinentiis, mensuris, iuribus, racionibus et actionibus, cum introitibus et exitibus, accessibus et egressibus, usantiis et requisitione suis in integrum pertinentibus, ad habendum, tenendus et possidendum et quicquid sibi placuerit faciendum salvis pactis infrascriptis, dando et solvendo ipse Tridentinus conductor eiusque heredes et ab eo causam habentes eidem domino abbati pro dicto monasterio eiusque successoribus et ab eo causam habentibus dictos undecim solidos veronensium parvorum ficti perpetui annuatim omni anno in kalendis martii vel earum octava, eo modo et pacto inter eos habito speciali quod si in primo anno non solverit dictum fictum quod indupletur pro quolibet anno in quo non fuerit solutum et si steterit per duos annos quod non solverit dictum fictum ipse conductor seu eius heredes aut ab eo causam habentes cadat seu cadant ab omni suo iure dicte rey locate et nichilhominus teneatur solvere fictum retentum de pacto speciali habito inter eos, et liceat conductori ius suum vendere, donare, pignori obligare, pro anima iudicare cui voluerit exceptis dominis, servis vel ecclesiasticis vel talibus personis que fictum impediant locatori, sed si dictus conductor ius suum vendere voluerit, primum denunciare debeat locatori et ei minori precio XX solidis veronensium parvorum quam alteri persone dare debeat si emere voluerit, sed si emere noluerit infra XV dies proximos post denunciationem ei factam vendat postea cui vellit exceptis suprascriptis personis, salvo iure ficti directi dominii et proprietatis unde solvitur dictum fictum, et dictus locator teneatur confirmare locationem in alium emptorem factam habendo ipse locator libram I piperis pro qualibet nova confirmatione et nulla alia superimposita fieri debeant inter eos. Quam vero locationem et reffutationem et omnia et singula suprascripta predictus dominus Gerardus abbas monasterii suprascripti pro se suisque successoribus et ab eo causam habentibus quantum est pro locatione et directo dominio et dictus Çulianus caliarius pro se suisque heredibus et ab eo causam habentibus quantum est pro reffutatione et utili dominio per stipulationem solempnem promiserunt et convenerunt predicto Tridentino condam Ruxe caliario pro se suisque heredibus et ab eo causam habentibus semper et imperpetuum firmam, firmas, firma et rata habere et tenere et non contravenire sed ab omni persona, collegio et universitate cum racione defendere, warentare et legitime expedire in pena dupli dampni et expendii et predicte rey reffutate atque locate sicut pro tempore meliorata fuerit aut plus valuerit in laude et exstimatione bonorum virorum et sub ypotheca et obligatione omnium suorum bonorum presentium et futurorum, et per eum Tridentinum se dictam domum precario constituerunt atque manifestaverunt possidere vel quasi eiusque interdicto statim desyerunt possidere donec ipsius domus possessionem apprehenderit corporalem, dantes sibi verbum, licentiam et auctoritatem sua propria auctoritate intrandi ac etiam retinendi tenutam et corporalem possessionem dicte domus superius locate ac etiam reffutate, et ad mayorem cautellam constituerunt fratrem Amicum suprascriptum presentem qui eum ducat et ponat in tenutam et possessionem dicte domus. Item eo die, Tridenti in dicta domo superius locata seu etiam reffutata, presentibus Iacobino de Albiano, Iohanne de Mastayis, Delaydo suprascripto qui fuit de Lençima et nunc moratur Tridenti, Martino filio ser Albertini de Madruçio et aliis. Ibique predictus Çulianus caliarius et dictus frater Amicus ut procurator et procuratorio nomine dicti domini abbatis posuerunt predictum Tridentinum in tenutam et corporalem possessionem dicte domus eidem Tridentino locate et vendite, dando ei hostium ipsius domus in manibus quod est de super et etiam hostium canipe quod inferius est et ipsum claudendo et aperiendo pro tenuta et possessione, et etiam ipse Tridentinus condam Ruxe eius propria auctoritate intravit tenutam et corporalem possessionem dicte domus accipiendo ipsa hostia in manibus et hostium canipe claudendo et aperiendo et in ea stando et per eam eundo et redeundo, presentibus dictis Çuliano et fratre Amico animo posscidendi et presentibus testibus suprascriptis sine contradictione alicuius persone.

Ego Conradus condam domini Braçalbeni sacri palatii notarius interfui et rogatus scripsi.