PP, 133

Le pergamene dell'Archivio della Prepositura di Trento (1154-1297), a cura di E. Curzel, S. Gentilini, G.M. Varanini, Bologna 2004.

(SN) Anno Domini millesimo CC°LX nono, indictione XII, die iovis tercio intrante ianuario, in monasterio infrascripto domini dum Bonaventure abbatis monasterii Sancti Laurencii prope Tridentum, presentibus Belebono de Waytis, Rescaço bobulco, Albertino de Cagno qui moratur cum domino abate et aliis. Ibique Tridentinus frater Gandolfini caliarii refutavit et resignavit in manibus dicti domini dum Bonaventure abatis monasterii Sancti Laurentii de Tridento, presentibus fratribus Bonçano et Girardo dicti monasterii, omne suum ius ractiones et actiones, reales et personales, utiles et directas quod et quas habet vel aliquo modo habere posset in uno suo stabulo cum muro et hedificiis iacenti in Tridento in hora Visine, cui choeret ab una parte Tridentinus Balçollus, ab alia Floreta, ante via, forte et alie sunt choerentie, de quo solvitur ipsi domino abati pro dicto monasterio X solidorum veronensium fictum perpetuum annuatim in kalendis marcii vel in eius octava secundum usum et consuetudinem domorum mercatus Tridenti. Ad hoc fecit dictus Tridentinus dictam refutacionem in dictum dominum abatem, quod ipse debeat investire Boninsignam sartorem qui moratur in domo domini Girardi capeleri de dicto stabulo, et promisit dictus Tridentinus pro se et suis heredibus ipsi Boninsigne et eius heredibus et cui dederit dictum stabulum ab omni impedienti persona in ratione defendere et warintare et expedire in pena dupli dicti stabuli et dampni et dispendii et interesse, quod si facere contempserit duplum ei restituere cum omni dampno et interesse et solvere promisit pro pena, et pena soluta postea atendere sub obligatione omnium suorum bonorum; pro qua vero resignacione et refutacione dictus Tridentinus contentus et manifestus fuit se acepisse et habuisse a dicto Boninsigna XV libras veronenses, renuntiando exceptioni non habite et numerate peccunie et ipsam in se habere dixit tempore contractus. Hoc facto predictus dominus dum Bonaventura abas dicti monasterii Sancti Laurentii et pro dicto monasterio, presentibus et consentientibus dictis fratribus Bonçano et Girardo, iure et nomine locationis in perpetuum secundum usum et consuetudinem domorum mercatus Tridenti investivit dictum Boninsignam in se et suis heredibus de dicto stabulo cum omnibus suis confinibus, ractionibus et actionibus, ita ut ipse Boninsigna et eius heredes de cetero et cui dederit habere et tenere debeat sine omni contradictione dicti locatoris et eius succesorum, ad fictum inde dandum et solvendum annuatim dicto domino abati pro dicto monasterio et eius succesoribus in kalendis marcii vel in octava X solidos veronensium parvorum, et si fictum ita non solverit in primo et secundo anno indupletur et si per tres annos fictum tenuerit cadat ab omni suo iure locationis predicte; et liceat dicto conductori et eius heredibus ius suum dicte locationis vendere, donare, pignori obligare et pro anima iudicare cui voluerit exceptis servo, famulo neque potenti viro, sed si ipse conductor ius suum vendere voluerit, primo locatori denunciet, et ei volenti emere XX solidis veronensibus minori precio quam allii persone dare debeat si emere voluerit, et si emere nolluerit infra XV dies facta denuntiatione postea vendat cui vellit preter exceptis personis, habendo locator libram unam piperis pro omni nova confirmatione in allium emptorem facta, nulla alia superimposita inter eos fieri debeat. Et promisit dictus locator per stipulationem pro se et suis succesoribus dicto conductori et eius heredibus vel cui dederit in perpetuum dictum stabulum ab omni impedienti persona cum racione defendere et warintare et expedire in pena dupli dicte rei locate secundum quod fuerit meliorata aut valuerit in exstimatione bonorum hominum in conscimili loco, super omnibus bonis presentibus et futuris predicti monasterii eidem conductori pignori obligare et per eum se possidere manifestando eiusque interdicto desiit possidere. Et insuper predictus Tridentinus venditor omnia sua iura, ractione et actione que haberet in dicto stabulo ipsi emptori dedit, cessit, tradidit atque mandavit et ipsum procuratorem tamquam in rem suam constituit ut ita possit agere, causari, placitare, experiri, excipere et convenire et se tueri et omnia facere sicut ipse venditor facere poterat nondum facta refutacione predicta, et pro eo se possidere constituit vel quasi, et eius interdicto desiit possidere, dando ei licentiam sua autoritate intrandi in tenutam et corporallem possessionem dicti stabuli.

Ego Çaninus sacri pallacii notarius interfui et rogatus scripsi.