PP, 130

Le pergamene dell'Archivio della Prepositura di Trento (1154-1297), a cura di E. Curzel, S. Gentilini, G.M. Varanini, Bologna 2004.

(SN) Anno Domini millesimo ducentesimo sexagesimo septimo, indicione decima, die septimo exeunte martio, apud civitatem Tridenti in claustro monasterii Sancti Laurencii in Pedecastello, in presentia domini Bontempi presbiteri Sancti Georii, fratri Pellegrini eiusdem loci, domini Bonaventure de Sancta Anna, Henrici qui fuit de Oveno, magistri Iohannis ferarii, Tridentini ferarii qui fuit de Oveno, Warnerii ac Manfredini qui fuit cognatus condam domini Menegelli et alliorum testium rogatorum. Ibique dominus Bonaventura Dei gratia abas monasterii Sancti Laurencii iuxta Tridentum nomine locationis et conductionis imperpetuum secundum usum et consuetudinem domorum mercatus Tridenti et pro melioramento et utilitate dicti monasterii per se suosque successores investivit Iohannem condam Pellegrini ferarii qui fuit de Oveno in se suosque heredes utriusque sexus et cui dederit de una domo cum canipa et edifitio supra se habente, que iacet in civitate Tridenti iusta plateam communis, cui domui choeret ab una parte dominus Tridentinus condam domini Rodulfi Rubei, ab alia scilicet versus meridiem est domus Delaydi Mome, ab uno capite curit via communis, ab alio domus in qua habitabat dominus Yvanus qui fuit condam domini Nicholay Malapeça, forte et alie sunt choerencie hiis, ita ut dictus Iohannes conductor eiusque heredes et cui dederit ipsam domum cum canipa et cum omni iure et ratione et melioramento ipsius habeat et teneat et quicquid velit faciat, scilicet vendere, donare, pro anima iudicare, pignori obligare sine omni predicti domini Bonaventure abatis suorumque successorum contraditione, solvendo ipse Iohannes conductor fictum omni anno in festo sancti Michaelis quindecim solidos denariorum veronensium parvorum vel octo dies post dicto monasterio, et si ita omni anno non solverit debet fictum induplare, et si steterit per tres annos quod non solvat debet cadere ab omni suo iure; et promisit per stipulationem dictus dominus Bonaventura abas per se suosque successores dicto Iohanni conductori utile dominium et directum et locationem et omne ius et omnes rationes dicte domui pertinentes in integrum ab omni persona in ratione defendere et expedire ac disbrigare ab omni persona si impedita inveniretur suis propriis expensis aut dampnum in duplum ei restituere, sub obligatione omnium bonorum dicti monasterii mobilium et immobilium presentium et futurorum, et si ipse conductor ius suum aliquo tempore vendere voluerit, dictum dominum Bonaventuram vel suum successorem requirere debet et ei pro XXti solidis minus dare quam alii persone si emere voluerit, et si infra octo dies facta requisitione emere distulerit, vendat postea cui velit excepto potenti homini vel servo, scilicet tali persone que fuit ydonea ad dictum fictum solvendum, confirmante domino investituram tantum pro una libra piperis sine alia superimposita, et si dictus dominus Bonaventura abas vel eiusque successor suum ius vendere voluerit, primo dictum Iohannem eiusque heredes requirere debet et ei pro XXti solidis minus dare quam alii persone si emere voluerit, et si infra octo dies facta requisitione emere distulerit vendat postea cui velit dummodo sit ydonea persona. Et sic dominus Bonaventura abas pro eo et eius nomine constituit, dando dicto Iohanni conductori fratrem Artusium dicti monasterii qui ponat eum in tenutam et corporalem possessionem dicte domus vendite donec intraverit tenutam et corporalem possessionem, dando dictus dominus Bonaventura abas per se suosque successores iamdicto Iohanni conductori omne ius omnesque actiones reales et personales, utiles et directas quas vel quod habet in dicta domo locata. Pro qua vero locatione et dacione sive intradige dicte domus dictus dominus Bonaventura abas fuit confessus et contentus se accepisse et iam in se habuise a dicto Iohanne conductore vigintiquinque libras denariorum veronensium parvorum, renuntiando exceptioni coram dictis testibus et me notario infrascripto non numerate pecunie et non habiti precii et exceptioni doli mali, pacti conventi et in factum generalem, et dictas XXV libras iam in se habere dixit et manifestavit, qua propter promisit dictus dominus Bonaventura abas per se suosque successores iamdicto Iohanni conductori dictam domum et melioramentum dicte domus et omne ius et omnem rationem quod et quam habet vel habere posset ab omni persona in ratione defendere et expidire sive disbrigare aut dapnum in duplum ei restituere sub obligatione omnium bonorum dicti monasterii. Et protestatus fuit dictus dominus Bonaventura abas dictam domum nulli alii esse datam, locatam neque alienatam preter quam iamdicto Iohanni, et quod dictus Iohannes conductor aliquod ius in dicta domo habebat et ideo ei melius forum fecit ut quia pro minori precio ei locavit quam valeret, et de omni eo quod plus valeret vel valere posset nomine donationis que dicitur inter vivos ut amplius revocari non possit dictum Iohannem investivit. Quas vero XXV libras veronenses dictus dominus Bonaventura abas protestatus fuit coram dictis testibus debere expendi in utilitate et melioramento dicti monasterii ut in facienda sive construenda vel levanda domus prope eclesiam Sancti Polonarii, qui dominus Bonaventura abas renuntiavit privilegio fori et ecclesiastico benefitio et decretali dicenti «Si diligenti»1 et omnibus aliis legibus et rationibus pro quibus non posset obligari.

Ego Henricus sacri pallacii notarius interfui et rogatus scripsi.