PP, 83

Le pergamene dell'Archivio della Prepositura di Trento (1154-1297), a cura di E. Curzel, S. Gentilini, G.M. Varanini, Bologna 2004.

In nomine domini Dei eterni. Anno eiusdem nativitatis millesimo ducentesimo quadragesimo tercio, inditione prima, die quintodecimo intrante iunio, aput castrum Tridentinum in curtivo monasterii Sancti Laurencii, presentibus dominis Federico de Bursa, Bartholomeo de Brentonico, Otone de Brixia et aliis. Dominus Martinus abbas monasterii Sancti Laurencii, presentibus presbitero Bonaventura priore, Gottifredo fratribus et monachis eius volentibus et consentientibus, vice et nomine ipsius monasterii pro se et suo capitulo, iure locationis perpetualis ad usum et consuetudinem domorum mercati Tridenti investivit Altimiliam uxorem Fabe in se et eius heredes de orto uno iacente in pertinenciis Tridenti ultra Attaxim, choeret ab una parte domina Caracosa, ab alia uxor condam Swicherii sartoris, a tercia vero Bonaventura de Nago, a quarta via, tali quidem pacto quod de cetero ipsa Altimilia locationem predictam habere et tenere debeat cum introitu et exitu, cum superioribus et inferioribus et cum omnibus rationibus et actionibus eidem orto in integrum pertinentibus sine omni contradictione vel repetitione dicti domini abbatis et successorum eius, ad affictum dandum, solvendum atque reddendum perpetualiter eidem monasterio omni anno in festo sancti Michaelis vel in octava novem solidos veronensium parvulorum, et si dictum affictum ad terminum non solverit illo anno indupletur, si vero per duos annos tenuerit cadat a iure suo et in monasterium libere revertatur; et liceat eidem Altimilie et cui dederit et potestatem habeat ius suum dicte locationis vendere, donare, pro anima iudicare et pignori obligare cuicumque voluerit exceptis talibus personis que non impediant affictum domino, quod si dicta Altimilia ius suum vendere voluerit, prius locatori vel successoribus eius denunciare debeat et ipsi emere volenti pro viginti solidis minus quam alii persone dare teneatur, si autem emere noluerit infra quindecim dies post denunciationem ei factam vendat cuicumque voluerit preterquam exceptatis, dando unam libram piperis domino pro omni nova confirmatione seu investitura, alia ius vel superimposita inter eos fieri non debeat. Sicque dedit ei licenciam et parabolam sua auctoritate intrandi tenutam et possessionem ipsius per stipulationem, sibi promittens per se suosque successores cum obligatione bonorum monasterii se pro ea possidere constituens, warentare et deffendere ei ipsam locationem cum ratione ab omni persona eam impediente in pena dupli dampni et dispendii locationis ipsius aut secundum quod fuerit pro tempore meliorata vel valuerit, sub bonorum hominum extimatione in consimili loco evictionis tempore reficiendi.

(SN) Ego Beraldus de Caudalonga imperialis aule notarius interfui et iussu eorum hec scripsi.