PP, 67

Le pergamene dell'Archivio della Prepositura di Trento (1154-1297), a cura di E. Curzel, S. Gentilini, G.M. Varanini, Bologna 2004.

Anno Domini millesimo ducentesimo trigesimo octavo, indicione XI, die dominico VI intrante iunio, in civitate Tridenti, ante domum Sileti condam Saurini, in presentia Iohannis de Çacarano et Tridentini notarii et Strailari et Rolandi condam Rodulfi notarii et Oti calderarii qui fuerunt rogati testes. Ibique Siletus filius condam Saurini peliparii et eius uxor domina Bona refutaverunt in manu domini Odolrici de Kirkemano de civitate Tridenti unam domum cum canipa murata, que iacet in civitate Tridenti in capite pontis Atexis, ab uno latere Ottus calderarius, ab alio latere Henrigacius, ab uno capite via, ab alio capite broillo qui fuit condam domini Riprandi de Otho Richo, quam domum dictus Siletus tenebat ad fictum ab dicto domino Odolrico, et in tali modo fecerunt dicti iugales dictam refutacionem in suprascripto domino Odolrico quod dictus dominus Odolricus debet investire Adelpretum condam Lafrankini de Oveno, et promiserunt per stipulacionem iamdicti iugales per se et suos heredes iamdicto Adelpreto et suis heredibus defendere et warentare et expedire dictam refutacionem in integrum, sub pena dupli tocius dampni et dispendii in quo dictus Adelpretus evenerit pro suprascripta refutacione, et insuper suprascripta Bona renunciavit auxilio senatus consulti Veleiani, iuri ypotecarum et omni legum auxilio in suprascripta refutacione competenti, pro qua vero refutacione iamdictus Siletus et uxore sua Bona confessi fuerunt se accepisse ab dicto Adelpreto XIIII libras denariorum veronensium et renunciando exceptioni iamdictis denarios iam in se habere dixerunt. Et ibi incontinenti facta suprascripta dominus Odolricus condam Kerkemani nomine iure locacionis imperpetuum ad usum et consuetudinem domorum mercatus Tridenti investivit Adelpretum condam Lafrankini de Oveno de suprascripta domo refutata que iacet in capite pontis Atexis in civitate Tridenti cum omnibus suis pertinentiis, racionibus et accionibus, introitu et exitu et cum superioribus et inferioribus suis in integrum dicte domui pertinentibus; choeret ei ab uno latere Ottus calderarius, ab alio latere Henrigacius, ab uno capite via, ab alio broillo qui fuit condam domini Riprandi de Ottone Richo, et alii forte sunt choerentes. Tali vero pacto fecit dictus dominus Odolricus dictam investituram de suprascripto domo cum canipa in suprascripto Adelpreto quod ipse Adelpretus conductor et eius heredes illam locacionem hinc in antea habere et tenere debeat sine ulla contradicione dicti domini Odolrici et suis heredibus, ad fictum solvendum omni anno dicto domino Odolrico vel suis heredibus in kallendas marcii octo diebus antea vel octo post sex libras veronenses, et si tunc fictum solutum non fuerit infra annum indupletur, alia vi super nec inposita inter eos fieri non debeat; quam vero locacionem dictus dominus Odolricus promisit per se et suosque heredes ipsi Adelpreto et suis heredibus semper hinc in antea omni tempore ab omni persona cum racione defendere, auctoriçare et expedire sub pena dupli dampni in quo ipse venerit tempore evicionis estimandi in consimili loco pro predicta domo cum canipa, licitum sit conductori vel suis heredibus suum ius quod habet in dicta locacione vendere, donare, pro anima iudicare cuicumque voluerit excepto tali persone que fictum non impediat, et si suum ius vendere voluerit, primo denunciare debeat ipso domino Odolrico et suis heredibus et eis pro XX solidis ad minus dare debeat de eo quod ab alia persona sine fraude habere potuerit si emere voluerint, et si emere noluerint infra XV dies postquam ei denunciatum fuerit tunc vendat cui voluerit, habendo locatore vel suis heredibus unam libram piperis pro omni nova confirmacione in emptorem facta, et ita per eum se possidere manifestavit et per eius interdicta desiit possidere et ipsum in possessionem ingredi iussit; et insuper iamdictus dominus Odolricus locator et ipsius Adelpretus conductor obligaverunt inter se omnia sua bona presentia et futura pignori pro ita atendendo ut dictum est superius in integrum, et unus pro alio se possidere manifestavit. Unde duo brevia in uno tenore scripta sunt.

(SN) Ego Graciadeus sacri pallacii notarius interfui et rogatus hanc cartam scripsi.