PP, 40

Le pergamene dell'Archivio della Prepositura di Trento (1154-1297), a cura di E. Curzel, S. Gentilini, G.M. Varanini, Bologna 2004.

Anno Domini millesimo ducentesimo XX, indictione octava, die iovis septimo in trante madio, in curia monasterii Sancti Laurentii, in presentia Ambrosii coqui, Rivani de Banale, Venerandi, Mascarini, Margariti, presbiteri Henrici pluriumque aliorum. Ibique dominus Amulpertus abbas predicti monasterii, volumtate et consensu magistri Greponis, dompni Iohanis fratrum suorum ibi presentium, nomine locationis imperpetuum secundum consuetudinem domorum mercati Tridenti investivit Albanum qui fuit de Salurno tamquam liberum hominem in se suisque heredibus utriusque sexus liberis nominatim de tribus passis terre casalive posite in contrata Sancti Martini, cui coheret a duabus partibus terra que tenetur per dictum monasterium, de antea via publica, de retro Atesis, ita ut ipse Albanus et eius heredes amodo dictam terram cum omnibus suis pertinentiis, coherentiis, confinibus, racionibus superioribus et inferioribus suis in integrum habere et tenere et uti debeat, hedificando ibi domum, et vendere, donare, pro anima iudicare sine omni predicti abbatis eiusque successorum contradictione, salvo eo quod non liceat ei alienare ipsam rem locatam militi nec servo nec potenti homini nec persone alicuius condictionis, ad fictum hinc in antea solvendum et dandum dicto monasterio vel eius nuncio semper in kallendis martii vel eius octavo XII solidos veronenses pro quolibet passo conductos ad dictum monasterium, et si ita annuatim non solverit in dicto termino quod deinde in anno infra annum debeat fictum induplare sine alia pena, et si steterit per duos annos quod non solvat ipsum fictum quod debeat ab omni suo iure cadere et rem locatam cum omni melioramento expeditam dicto monasterio dimittere. Et promisit dominus abbas pro se et suis successoribus dicto locatori ab omni persona racione defendere et expedire aut dampnum in duplum ei restituere secundum quod res foret meliorata aut valeret sub extimatione et in consimili loco, et si ipse locator aliquo tempore suum ius vendere voluerit, domino monasterii requirere debet et ei pro XX solidis minus dare quam alii persone si emere voluerit, et si infra XV dies post requisictionem emere noluerit vendat postea cui velit preterquam exceptatis et tali persone que ydoneam faciat securitatem de ficto solvendo dicto monasterio, confirmante domino monasterii pro una libra piperis investituram, nullam aliam superimpositam faciendo. Tale pactum fuit inter eos videlicet quod si aliquo tempore apparuerit quod dictus locator vel eius heredes non sint liberi vel quod se servituti alicuius domini se supponerent, quod dicta investitura penitus sit cassa et inutilis et quod dicta res locata similiter cum omni melioramento ad dictum monasterium libere revertatur. Et ita dedit ei dictum Mascarinum qui ipsum ponat in tenutam. Et plures cartas unius tenoris inde fieri rogaverunt.

(SN) Ego Obertus de Placentia notarius sacri pallacii huic interfui et scripsi.