PP, 13

Le pergamene dell'Archivio della Prepositura di Trento (1154-1297), a cura di E. Curzel, S. Gentilini, G.M. Varanini, Bologna 2004.

(SN) In Christi nomine. Anno a nativitate eiusdem MCNVIII, die dominico XVI exeunte augusto, indictione prima, in curia monasteri Sancti Laurenti de Tridento, in presentia Amirati, Hermani Bokelini, Henrici Wimani, Odelrici Grossi de Tridento, Henrici Stokelini de Bauçano, [....]ni et Conradi filii Wili de Bauçano, Rempreti atque aliorum plurium rogatorum testium. Ibique Çuco ferarus refutavit in dominum Amulpertum abbatem monasterii Sancti Laurentii omne ius et omnes actiones quod vel quas ipse habet in casamentis ********* cum edificio lignaminis super se habentibus et que iacent in burgo Tridenti in capite pontis Atesis, eo modo ut dominus abbas debeat investire Hermanum Vakelinum de ipsis casamentis et edificiis. Promisit insuper idem Çuco quod hanc refutationem ratam et firmam omni tempore per se et suos heredes habebit et tenebit et defendet et auctoriçabit Hermano dicto et suis heredibus ipsa casamenta et edificia rationabiliter ab omni homine contradicenti omnique tempore sub pena dupli totius dampni quod eidem Hermano inde evenerit, et pro precio huius refutationis et caneve murate que est retro ipsa casamenta prefatus Çuco a predicto Hermano Vakelino centum et viginti quinque libras veronensis monete renunciando exceptioni non date et non numerate peccunie confessus est se accepisse. Ibique incontinenti prememoratus dominus Amulpertus abbas per se suosque eiusdem monasterii confratres investivit prefatum Hermanum Vakelinum de ipsis casamentis et edificiis predicti monasterii iuris per iudicatum Trentini Strusi bone memorie, ad fictum annuatim et perpetuo domino abbati et eius in eodem monasterio successoribus in kalendis marcii octo dies ante vel post solidos XX veronensis monete per se ipsum Hermanum vel per suos heredes sive per suum nuncium reddendum; si vero per annum fictum tenuerit debet induplari, si per biennium contra dominorum voluntatem tenuerit a iure suo cadat. Debet autem predictus Hermanus et sui heredes ipsa casamenta cum edificiis perhempniter habere, tenere, vendere, donare ac pro anima iudicare et facere quicquid sibi et heredibus suis deinceps placuerit debeat, et ei liceat secundum usum et consuetudinem et rationem domorum Tridentini mercati, salvo ficto et salvo eo quod si conductor vel sui heredes ius suum vendere voluerit quod primo domino et suis successoribus denunciare debet et eis solidis XX veronensis monete minus quam aliis dare si emere voluerint, et si noluerint cui voluerit infra dies octo ex quo eos ademptionem apellaverit vendat, et dominus de venditione libram unam piperis habere debet et confirmare debet, et promisit datum et cartam in alium emptorem sine alia superinposita. Promisit insuper dominus abbas predictus per se suosque successores et confratres conductori et suis heredibus proprietatem ipsorum casamentorum defendere et warentare rationabiliter ab omni homine et omni tempore sub pena dupli sicut pro tempore fuerit meliorata aut valuerit sub estimatione bonorum hominum in consimili loco, et dedit dominus abbas predictus Hermano conductori Amiratum qui eumin possessionem de ipsa locatione inducat; attamen servo vel viro potenti idem conductor alienare non debet suum ius. Coheret ipsis casamentis ab uno latere habet Pessatus, ab alio **** de Supramonte, ante communis strata corit, retro est caneva ipsius Çuconis.

Ego Gratiadei notarius sacri palacii interfui et ut supra legitur rogatus scripsi et complevi.